CASTEDDU – Su guvernu depet atzudare sas pessones chi detzidini de comporare una vetura o ateru metzu de trasportu chi caminede a elètricu. L’afirmada s’Uecoop, su sòtziu chi reunidi afurriu a batosmitza coperativas de s’Italia. Su resonamentu est fàtzile e ciaru, a intendere sos diritzentes: «medas tzidadinos, privaos e fintzas titolares de aziendas, diant cherrere a colare dae su metzu a benzina o nafta a cussu chi funtzionat cun s’eletricidade, ma non bi lu achene ca costant caros. Duncas, custa sa resone de dare su contributu. Mentras sa cosa no s’ispostat de meda si s’ischerta, pro cumbinchere sas pessones a cambiare zenia de metzu, est cussa de creschere sas tassas in supra de veturas e metzos de cummerciu cun motores tradissionales».

Costu in dinare a parte, carchi cosa in s’Italia est già mudande e su fatu est de bonu auguriu in su caminu pro minimare s’inquinamentu e duncas mantennere prus sanu cussu chi est conotu comente ambiente naturale. Tra su 2017 e su 2018 (fintzas a su mese de San’Andria) est creschia de su 34 pro chentu s’ischerta de metzos mutios “ibridi”, diant essere cussos cun duos motores, unu a nafta o benzina e s’ateru a elètricu. Ini 63mitza e 700 cussos vendios in su 2017, mentras sun’istetios belle 9mitza ocannu. Creschida pro su fatu chi sos metzos chi venint fabbricaos como sun sèmpere de calidade prus arta e dant un afidamentu bonu. Datos, in mentzoria, duncas, mancari sa situassione de undu non cambiet meda. Ca difatis galu como s’85 pro chentu de sas veturas chi circolana in s’Italia sun de sa zenia vetza. S’Uecoop autenticada chi tra sas dificurtades a colare da una zenia a s’atera de metzu de ispostamentu e trasportu b’est su fatu, chi «sos distributores de s’elètricu presentes in sos caminos sun galu pacos e duncas est palese sa dificurtade a s’ispostare pro viatzos longos cun sas veturas chi funtzionant cun cuss’energia». Tra sos interessaos a fachere creschere s’impreu de sos metzos elètricos propriu sos sotzios in coperativa. Sas resones sunu tantas. Una de importu montovà sempere dae s’Uecoop: «In sas garas de apaltu a sas cale picana parte sos sotzios in sos diferentes territorios dant prus puntos a chie podet impreare metzos chi caminant a elètricu. Podendelos àere già disponìbbiles vat possibilidades prus artas de picare s’apaltu matessi».

© Tutti i diritti riservati