Il Comune di Nuoro (foto S.Novellu)
NUGORO – Sa Comuna de Nugoro contipizada pro isorvere sa chistione de sos depidos atos cu sa Cassa depositi e prestiti. Intro a merculis 28 de Sant’Andria, a mesudie, an’a depere essere presentas sas ofertas de sas bancas chi chere a si picare in palas su depidu matessi, in manera chi sa Comuna potzada cuntzare sos contos cun sa cascia romana. In s’oferta depede essere istabiliu s’interessu chi sa banca disponibile a s’impignu dimandada in cambiu a sa Comuna matessi. Sa resone de s’atu dae parte de s’amministratzione cumonale, cuvrennà dae Andrea Soddu, est de minimare su tantu de s’interessu, chi como assumada a su 4 e 5 pro chentu e chi diada depere abasciare afurriu a due 2 e 3 pro chentu. Sos mutuos de ispostare dae sa Cassa depositi e
prestiti a una banca ordinaria sunu 164, pro unu capitale de 38 miliones de euros. S’iscadèntzia posta in sos annos colaos est cussa de su 2042. A custu tantu est de atzunghere su garrigu de s’interessu, chi como assumada 26 miliones de euros. Tantu chi si pessada de abasciare nessi de una deghina de miliones, propriu cun s’atu de cuntzare sa pendentzia cun sa cascia de sos ente locale e de l’ispostare a sa banca chi at’a presentare s’oferta prus cumbeniosa pro sa Comuna. Sa banca cun sa cale at’a essere frimaus s’accordu est obbrigà a tramudare sos tantos a sa cascia de sa Comuna (cuvrennà dae sa tesoreria) intro su tempus postu dae s’ente matessi. Paris cun d’unu anticipu de cascia de duos miliones ‘e mezu de euros. Totu custu in manera chi sa Comuna matessi potzada cuntzare sos contos cun sa Cassa depositi e prestiti intro a su 31 de su mese de Nadale. De ammentare chi sa detzisione de achere su cambiu de banca (dae sa pubbrica a cussa cummerciale) at’a costare a sa Comuna nugoresa puru una multa de una paja de miliones de euros. Una parte però la garantidi s’Istadu, chi ata detzisu de intervennere pro illepiare sas dificurtades de sos ente locales. Sos depidos chi sunu in concas a sa Comune de Nugoro sunu vetzos de annos e annos. Si tratada su prus de dinare picau dae Cassa depositi e prestiti pro pacare sos tantos a tzitadinos a sos cale est istà esproprià sa terra e mai pacà, o non pacà a pretziu de mercau. Ateros depidos sa Comuna matessi los ad’atos cun impresas, comente cusseguèntzia de apaltos brocaos prima de sa cuntzada de su tribagliu o pro cuntratos in sos cale sempere sas amministratziones sunu vennias mancu a s’impignu picau.
Francesco Pirisi
© Tutti i diritti riservati