Su territoriu de su Mandrolisai est’istau marcau in su registru chi pro s’Italia intrega accolidi sos terrinos cun signos distintos e chi sunu abbarraos ogales in su tempus. S’atu est acolliu in d’unu decretu atu dae su ministeru de s’Agricoltura (como connotu cun su numene de Politiche agricole).

S’impignu de proponnere sa cosa l’ada picau sa Regione, paris cun s’universidade de Zazzari, e sas comunas de Atzara e Sorgono.

Propriu sa Regione, cun s’assessore de sos Entes locale, Cristiano Erriu, ata afirmau: «Si tratada de unu riconnoschimentu de importu, puru cussiderande chi in totu s’Italia de custas zenias de terras distintas, e signas in su registru, vindada solu batordighi. Pessamus de achere sos matessi passos – at’azuntu Erriu – pro ateras zonas de s’isola. Già dae como amus preventivau de ponnere a un’ala sos tantos in dinare netzessàrios e puru de aperrere un’iscola a posta inuve s’istudiada su paesagiu agriculu cun totus sos signos proprios».

Sa resone pro sa cale su territoriu achede parte de su registru est pro su fatu chi s’est mantesu ogales in sos annos e seculos, cun sa richesa de sos buscos e sas zonas agricolas, inuve venidi cortivà sa vide e s’oliva, prima ‘e totus. Sos amministradores de sas duas comunas interessas pessana a sos benefitzios chi su titulu retziu at’a podere dare mesche a sas atividades de s’economia. Lu confirmada su sindigu de Sorgono, Giovanni Arru: «Tra sas particularidades de sa zona nostra veste su fatu chi su numene propriu est su matessi de cussu de una senia de vide, e de vinu, su Mandrolisai, chi ada sa marca Doc.

Como sa cosa de achere est chi totus sas atziendas chi riunana, impreande in su mercau unu numene a cumone». Cuntzetos non diferentes sos de su colega de Atzara, Alessandro Corona: «Pessamus de ponnere paris unu protzetu chi riunada tantas atividades economicas ligas propriu a custu riconnoschimentu e de su cale apana benefitziu». Tra sas cosas de atzunghere a s’arresonu in supra de sa detzisione picà dae su ministeru, veste su zudìssiu e s’esamene de sos espertos de s’universidade de Zazzari.

Su professore Alessandro Dettori, de su Dipartimentu de Agraria: «In sas campagnas de su Mandrolisai dae s’Ottighentos a sos tempos nostros sas terras pro bona parte sun’abarras ogalese, dae sos buscos a sos tretos pastinaos a bintzas e ortos. Mentras in bona parte de sa Sardigna, e mesche in sas zonas de s’internu, sos terrinos sun’istetios vortaos, pro lo s’impreare pro s’allevamentu, a dannu de sa coltivatzione».

Sa cunfirma in su cufrontu tra sos retratos atos dae s’aparèchiu in su 1954 e cussos de su 2016, chi mustrana chi locos e impreos de sa terra sunu sos matessi. E custu in sa parte manna de su territoriu de su Mandrolisai, si no in totughe.

• Francesco Pirisi