Il Palazzo del Consiglio della Regione Sardegna (foto S.Novellu)
Cateddu Sa Regione e su guvernu tzentrale an’apiù unu cufrontu martis colau pro isorvere sa chistione de cussos chi venini mutios “accantonamenti”, diana essere sos tantos chi s’Istadu pedidi a sas regiones de brocare pro parare fronte a sos depidos, cussos connotos comente “debito pubblico”. Impignu de 285 milones de euros, preventivau in su 2012 dae su guvernu cuvrennau dae Mario Monti. E, propriu dae pacu, creschiu a 536 miliones de euros. Aztunta detzisa pro su fatu chi sa Regione sarda ses negà de pacare, apustis chi sa Corte costituzionale cun sententzia ata istabiliu chi non b’idi su diritu de s’Istadu de lo pedire e, duncas, su dovere de sa Regione de los ponnere a un’ala. Ideas e bolontades diferentes chi sun’istas postas in pare in sa reunione in su ministeru de sos Affarios regionales, chi ses tennia martis 20 de Sant’Andria. Pro sa Regione sarda ini presentes su guvernadore Francesco Pigliaru e s’assessore de sa Programmatzione e Bilanciu, Raffaele Paci. Mentras pro su guvernu si sunu presentaos sos dirizentes de su ministeru. Ma già cun sa promissa de una secundu atopu, in prope, a su cale ana a picare parte Erika Stefani, ministra pro sos Affarios de sas Regiones, e Massimo Garavaglia, chi est sutasecretariu de s’Economia. Pigliaru e Paci ana pediu un acordu novu tra Istadu e Regione Sardigna, in sa materia. Acordu chi cada parte s’est impignà a frimmare primos chi siada su guvernu, siada sa Regione iscriana e aprobene sa letze de bilanciu. «Si depede istabilire in manera ciara cantu sa Sardigna depede colare a su guvernu, pro chi non b’apada cuntierras e lites in sa tzustissia», est’istau su resonamentu de s’assessore Paci. Sos tantos a sos cale pessada sa Sardigna non sunu tzertu cussos istabilios in Roma. Comente cufirmada su vatu chi non s’est adiriu né a sa prima dimanda, cussa ligà a sa letze de su capu ‘e su guernu passau, Monti, né a s’urtima cun s’atzunta fintzas a arribare a oltras 500 miliones. S’idea contraria de sa Regione ada comente resone de undu su fatu chi s’Istatutu ispetziale (cussu de su 1948) cussentidi a sa Sardigna diritos distintos puru pro cantu atenede a s’impreu de sos undos (recortos in Sardigna cun sas tassas) e s’ateru diritu, ligau a su primu, a non essere impignà a pacare sos depidos de s’Istadu, o in d’onzi casu non pro sos tantos marcaos dae su guvernu. Su dinare chi s’Istadu pedidi pro issu – est s’idea de su guvernadore Pigliaru e de Paci – sa Sardigna lu podede imbeces impreare pro sos protzetos de isvilupu, mesche in sas provincias prus issecus in sos servitzios e in sas atividades pro produere benes e richesa. Ischerta già posta in opera, mancari sos acordos non siana gal’istetios frimmaos. Difatis, sos 285 miliones sunu acollios in d’un’undu distintu, pro cucutzare sas ispesas in prus in s’amministratzione de sa Regione, a comintzare dae cussas pro sa sanidade.
Francesco Pirisi