Sa dimanda dae s’assemblea de sa Coldiretti sarda

ARBOREA – In sa die de su ringratziamentu de sa Coldiretti sarda dae Arborea est essia sa dimanda pro una bonifica nova de cussas terras, a unu seculu zustu dae sa prima. Sa resone est ligà in modu distintu a su fatu chi sas modias de su tempus de sos urtimos annos an’apiu cusseguèntzias graves pro sa comunidade e mesche pro chie tribagliada in sas coltivatziones e in s’allevamentu de su bestiamene. A lu achere presente est’istau su responsabile locale de sa Coldiretti, Giancarlo Capraro: «Su clima est sempere prus contrariu. Como su setore agriculu est galu irmartinde sas cusseguèntzias de sos traconarjos de su mese de Santu Gavini. Apenas oto meses primas vest’istà sa sicagna.

Su clima non est prus cussu de su passau e custas situassionese s’ana a ripitere sempere de prus. Pro custu vada bisonztu de un’atera bonifica, regulande s’andament de sas abas e acollindelas pro sos tempos in sos cale vada mancantzia. Cun sos printzipios – at atzuntu Capraro – de sos tribaglios de unu seculu achede, chi ana dau benefitziu mannu a Arborea e sa zona intrega». Sa Coldiretti regionale, cun su presidente Battista Cualbu, at’autenticau de essere pronta a sustennere s’impignu pro Aborea. Tra sas cosa de achede deretu, su soztiu agriculu ponede una cuferèntzia (unu forum, l’ana mutiu sos diritzentes) in sa cale faeddare de comente su clima est mudande in sa terra e duncas puru in Sardigna e de sos interventos chi s’omine podede achere pro minimare dannos e dificurtades. Unu datu est’istau comunicau durantes su cunvegnu de Arborea ed achede palese sa situassione: tra sos degh’annos istimaos comente sos prus cajentes de sempere, 9 sunu in su seculu chi est currende e de custos urtimos chimbe sunu istetios apustis de su 2010.

F.P.

© Tutti i diritti riservati