NUGORO – In su campionau de Eccellenza regionale de football sa Nuorese vinchede in su campu de su Tortolì e mantenede frimu su primu postu in sa classifica. Duos a uno su resurtau a sa fine de sos novanta minutos de jocu. Pro s’isquadra de Fabio Fraschetti ana signau su jocadore de atacu, Grigoriadis, grecu de radichinas, e Russu, chi operada in sa difesa, ma ispissu s’ispinghede a innantis cun periculu e dificurtade pro s’isquadra contraria. Apustis de sa vinchida de dominica (sa partzida est’istà jocà in su campu de Girasole) sa Nuorese ada sempere chimbe puntos de prus de su Sorso e de su Muravera. De custas urtimas, su Sorso est torrau cun sacu prenu de puntos dae s’isfida cun sa Ferrini, in Casteddu, mentras su Muravera at’atu 5 a 1 contra a su Tonara, in su campu suo. Duas de sas chimbe retes pro s’isquadra de su Sarrabus sun’istas signas dae su zobanu de Nugoro, Giuseppe Meloni, chi est unu tra sos jocadores de atacu prus ortes de sa categoria. Dominica chi venidi sa Nuorese torrada a jocare in su campu “Frogheri”, contra a s’Atletico Uri, isquadra de sa comuna acurtzu a Zazzari.

(F.P.)