ARBOREA – Sos otos de sa terra regalaos a sos prus poveros in Sardigna est’istau s’atu pro tzelebrare in sa mentzus manera sa die dedica cad’annu dae sa Coldiretti regionale a su ringraziamentu. Su mamentu de esta s’est tènniu sapadu 17 de Sant’Andria in Arborea, inuve in custa casione venini ammentaos sos chent’annos dae sa prima bonifica. Pastores e cortivadores ana picau parte a sa missa, preicà dae monsignor Ignazio Sanna, piscamu de s’arcidiocesi de Aristanis, cu radichinas in Orune. Tra sos presentes a su mamentu de esta su presidente de sa Coldiretti sarda, Battista Cualbu, e su direttore Luca Saba. Deretu apustis propriu sos dirizentes ana iformau s’assemblea de sa detzisione de su regalu de dare a sa domos de sos poveros cuvrennà dae sas monzas de Santu Zuseppe e a sa Caritas de sa diocesi. In totu chimbe quintales de recatu (de cosas de manicare), prodotu in Sardigna: dae su casu a s’oztu, a su vinu, a su mele. E paris, fruttura e birdura. Propriu su presidente Cualbu at dau meritu a sos sotzios de arene addiriu a s’atu de solidariedade: «Pastores e massajos ana chertziu essere parte de cust’atu de atzudu e afetu a benefitziu de sas pessones chi in custu tempus sunu afrigias dae sa mancàntzia de benes e de dinare, cando non sunu poveras in terra. S’atu est galu prus de importu ca arribada in d’unu mamentu in su cale sas aziendas sunu in sufèrentzia pro sas annadas malas de sos urtimos annos». Propriu durantes sa esta de su ringraziamentu in Arborea sun’istaos comunicaos sos datos in supra de sas dificurtades de una parte de sas popolassione sarda, secunde cantu atzertau dae sa Caritas sarda. Sunu 101mitza sas familias de poveros, chi reunini su 14 pro chentu de su totale de sos abitantes de s’isola. In su 75 pro chentu de custas domos mancana sos benes primarios, a comintzare dae su mannicu.
Primos de cunzare cun su contu de sa die de Arborea, de ammentare chi sos sotzios ana apertu puru sos bancos de su mercau de Campagna Amica. Atera cosa, vad’apiu puru unu mamentu de issegnamentu in supra de sas atividades de sa Coldiretti, a su cale ana picau parte afurriu a 600 pitzinnos de sa provincia de Aristanis.
Francesco Pirisi