Torrana traconarjos e lutos in Sardigna. Custa vorta corpia dae su tempu malu sa zona de sa Sardigna ‘e josso, a un’ala e a s’atera de Casteddu, pro duas dies cucutzà dae s’abba, abascià chenza limite nè dolu.

Su fatu prus tristu in Assemini, a una bindighina de chilometros dae su capoluogo, cun sa morte de una emina, Tamara Maccario, de 44 annos.

Sa vetura inu viatzavada sa emina est’istà broca dae su rivu ‘e abba in s’istrada chi dae Assemini juchede a Sestu. Cun issa su maridu e sos duos duos itzos minores, chi imbeces sunu resurtaos a si sarvare, succursos dae su pessonale de sa Protezione civile, de sos forestales e de sa zustissia, presentes in sa zona pro minimare sas dificurtades de sos abitantes. Tamara Maccario dae sa vetura non b’est resesia a essire e d’est morta annegà.

Sa familia sa dezisione de s’ispostare cun sa vetura l’aviada picà pac’ora primas, cun sa timoria chi si serene allagas sa zona inuve est posta sa domo issoro, in sas campagnas de Assemini. Ma su chi ada acatau, a dolu mannu, est istau pejus.

Preocupatzione e oras de tristura puru in Castiadas, in su Sarrabus, inuve mancada dae duas dies unu pastore de 38 annos, cun radichinas in sa Campania. Mentras in su Supramonte de Urzulei, est istà acatà e posta in sarvu una familia de turistas, de sa cale non s’aviada prus notissias. Da eris sa situazione est metzorà, ca s’est brocà sa ciota e medas istradas sunu tornas liberas. Sas cusseguntzias però sunu tantas.

Sa zona prus corpia dae su traconarju est su Campidanu ‘e basciu, siada in sa zona chi dae Casteddu andada gara a Villasimius, sia su trettu chi collegada sa tzitade cun Pula e Teulada. Cullegamentu, cust’urtimu, brocau ca in s’istrada istatale “195” ana tzediu sas costanas de unu ponte.

Francesco Pirisi