Sa comuna assignat como sas ingarrigas a sos tecnicos

NUGORO – Sa comuna de Nugoro at’assignare in prope s’ingarriga pro congruire sos prozetos de su pianu mutiu “delle periferie”. Su programma de tribaglios at preventivau vintiduas operas in totale, a daintro de sos setores de sa formatzione, de s’isport e de sa metzoria de sos tretos prepostos pro zardinos e parcos. Su pianu, coment’est cosa notoria, at retziu unu finanziamentu de degheoto miliones de euros dae su guvernu. Achet parte de su programma nazionale pro metzorare sas situassione de sos abitaos chi interessat afurriu a chentubaranta tzitades tra sas prus mannas de s’Italia. Summas a sas cale sunt de atzunghere undighi miliones assignaos dae sa Regione a daintro de su prozetu mutiu di “rilancio del Nuorese”. De non irmenticare, galu, chi in su pianu est preventivau puru unu contributu de operas (e, duncas, puru de tantos in dinare) dae parte de sos privaos, chi sunt interessaos a ponnere paris servitzios pro sa comunidade o aperrere butecas, chi siant in carchi modu de suportu a sas operas e atividades chi s’ant andare a costruire cun su pianu. Operas, abbarrande in cussas de prus importu, chi sunt cussas chi atenent a su recuperu de sos locales unu tempu impreaos dae s’Artiglieria e de su mulinu vetzu de sos Gallisais. Pro essere prus prezisos, in sos ses etaros a costazos de su viale Sardegna at a essere costruiu su “campus” pro s’universidade, cun domos pro istare e impiantos pro s’isport, custos urtimos disponibiles puru pro s’impreu dae parte de sa comunidade nugoresa. In sos locales de su mulinu de Santu Predu, imbeces ant a essere preparas sas aulas e sos laboratorios, sempere pro s’atividade de s’universidade. In contu, puru sa metzoria de sa zonas “virdes” (parcos e giardinos) e de sos parchegios, cun d’unu pianu de operas e de servitzios puru pro metzorare su trasportu e s’impreu de sos metzos pubbricos.

Francesco Pirisi