In tempos de campànnia eletorale sos leader de totu sos partidos sunt a chie mègius nde la podet leare cun sas promissas de abolire carchi cosa (e chie sas tassas universitàrias, e chie su cànone Rai, e chie sos vatzinos, e chie su Jobs Act…) finas a imbàtere a Luigi Di Maio de su M5s chi cheret abolire 400 leges faghende unu sondàgiu in su situ leggidaabolire.it.

A pustis de pagas oras, s’hashtag #AbolisciQualcosa in Twitter at tentu mìgias de essidas de onni tipu chi mustrant chi, a dispetu de sos tempos tristos, a sa gente no li fartat sa gana de rìere. B’at chie cheret abolire su ghisadu de seitan, chie sos grupos de mamas in Whatsapp, chie sa pabassa in su panetone, chie diat abolire sos chi tùssiant in teatru o sos tròculos cun sas mìgias.

In s’isetu de tempos mègius de custos, podimus pensare nois puru a ite cherimus eliminare dae sos anneos de sa vida.