Est su carrabusu, su sìmbulu chi at a impreare su Progetu Autodeterminatzione pro si presentare a sas eletziones polìticas de su 4 de martzu in sos collègios uninominales e proportzionales sardos. B’at unu chircu abertu, sa paràula “Autodeterminatzione” chi faghet de “protetzione” a su chircu, e su carrabusu comente elementu chi pulit s’ambiente tirende·nche sa brutesa dae mesu.

Su Progetu Autodeterminatzione ponet paris oto movimentos e partidos indipendentistas e sovranistas (Rossomori, Sardegna Possibile, Sardigna Natzione, Irs, Lìberu, Sardos, Comunidades e Gentes).

Est unu progetu nou, chi no atzetat alleàntzias cun partidos italianos. «Currimus in Itàlia ma sena partidos italianos, chi finas a oe a custa terra l’ant fatu dannu ebbia – at naradu Anthony Muroni, porta-boghe de su Progetu – Cherimus mandare a in antis unu progetu culturale e polìticu chi càmbiet s’idea de sos sardos in contu de auto-determinatzione».

Gianfranca Piras

© Tutti i diritti riservati