Blaise Matuidi, tzentru-campista frantzesu de sa Juventus, faeddat de ratzismu in sa partida Casteddu-Juventus de su 6 de ghennàrgiu.
In unu post publicadu in Instagram e in Facebook, Matuidi narat: «B’at istadu cumportamentos ratzistas in sa partida. Sa gente dèbile cheret impressionare sos àteros cun s’òdiu, ma deo a odiare non bi so bonu. So dispràghidu pro sos chi dant custos esempros malos, ca su fùbalu devet trasmìtere valores bonos, non malos».
No est sa prima borta chi Matuidi est vìtima de ratzismu, e in sa partida de su 6 de ghennàrgiu at domandadu a s’àrbitru Gianpaolo Calvarese de intervènnere, sena nde tènnere risposta.
Sos tifosos de su Casteddu sunt istados acusados de ratzismu àteras bortas puru. Ocannu passadu aiant avilidu a su giogadore ghanese Sulley Muntari chi, a pagos minutos dae sa fine de sa partida Casteddu-Pescara de sèrie A, aiat lassadu s’istàdiu a pustis de sas frases ratzistas. Gasi fiat capitadu finas in su 2010 contra a su camerunense de s’Inter Samuel Eto’o e in su 2009 contra a su malianu de sa Juventus Mohamed Sissoko.
Una birgòngia manna pro totu sos Sardos.
Gianfranca Piras
© Tutti i diritti riservati
