A si chèrrere tropu perfetos in su carenadu, in sa mente e in sa carriera ponet in arriscu sa salude mentale de sos giòvanos. Lu ponet in evidèntzia un’istùdiu de sa York St. John University de York (Regnu Aunidu) publicadu in su Psychological Bulletin.
Sos istudiosos ant esaminadu 41.641 istudiantes universitàrios americanos, canadesos e inglesos chi ant fatu unu test in contu de sos cambiamentos generatzionales in su perfetzionismu, dae sa fine de sos annos 80 a su 2016. Ant analizadu tres tipos de perfetzionismu: cussu riferidu a se (disìgiu de èssere perfetos); cussu “sotziale” (ite s’isetant sos àteros); cussu a cara a sos àteros (nos isetamus prus de su chi est). Nd’at essidu a campu chi sas generatziones de oe tenent puntègios prus artos (su 33%) contra a sas de eris, màssimu pro su chi atenet a su perfetzionismu sotziale. Forsis podet dipèndere dae sas retes sotziales virtuales, chi faghent crèschere s’isulamentu de sa gente.
«Sos giòvanos de oe sunt in cumpetitzione unu cun s’àteru. – narat Thomas Curran, autore de s’istùdiu – Sa sotziedade lis faghet pressione pro chi tèngiant semper bonos resurtados, e pro s’intèndere seguros cherent èssere perfetos». Ma a livellu psicològicu custu càusat ànsia, depressione e pensamentos nieddos cun livellos prus artos meda contra a su chi capitaiat a sas generatziones passadas.
Gianfranca Piras
© Tutti i diritti riservati