09In s’ispidale de Perùgia si bi màndigat bene. Lu narat unu chef “isteddadu” chi, a pustis de èssere istadu ricoveradu in s’ispidale Santa Maria de sa Misericòrdia, at iscritu una lìtera aberta a totu su personale de coghina narende cantu l’at corpidu sa calidade e s’atentzione chi ponent in su preparare s’ite de mandigare pro sos malàidos. «Bos fatzo sos cumplimentos – narat su chef in sa lìtera – ca a tènnere una calidade e unu servìtziu bonu gosi agiudat a dare s’idea de custu logu comente unu logu “normale” e no un’ispidale».

Sa supervisione de sa mensa la faghet sa dietista Daniela Capezzali, chi preparat sos menù paris cun duos coordinadores de coghina. «Amus puntadu subra de sa filiera curtza – narat sa dietista – e istamus atentos màssimu a sa petza, chi cheret allevada e masellada in Itàlia. A tenore de sos problemas de sos ricoverados asseguramus finas atentziones particulares, comente su de cambiare menù onni die pro sos malàidos ricoverados in ematologia».

Gianfranca Piras

© Tutti i diritti riservati