Sunt galu sighende sas polèmicas contra de un’initziativa cummertziale de sa Nutella chi at pesadu unu pubusone in totu Itàlia.
S’idea est de pònnere in sos botos un’eticheta cun espressiones tìpicas de sos limbàgios de totu sas regiones de Itàlia. Essende chi sas espressiones locales sunt contadas che “dialetos”, custas etichetas si narant “Dialettichette”.
Pro las fàghere ant iscomodadu unu grupu de espertos dae sas universidades de totu Itàlia, chi ant individuadu 16 àreas linguìsticas boghende a campu sas espressiones prus caraterìsticas de cussas àreas. Ognunu de nois, si cheret, si nde podet seberare una (o prus) pro si personalizare su botu de Nutella in antis de merendare.
A custu puntu sunt comintzadas sas brigas de sos chi unu pagu si nde sapint de linguìstica: e chie narat “Su meu no est unu dialetu ma una limba”; e chie non podet sufrire ca l’ant apitzigadu un’espressione de sos limbàgios montanos cando su limbàgiu suo est de logos pranos; e chie no atzetat chi nche l’apant inseridu in un’àrea e si cheret in un’àtera…
In Sardigna no aiat essidu mancu pìulu, e calicunu custu silèntziu de sos espertos l’at cuntestadu.
B’apo pensadu unu pagu, ma a nàrrere sa veridade de custa initziativa mi nd’importat belle nudda. Nen mi nd’allegro, nen mi nd’atristo: de su restu non si podent carrigare a coghineris e a mànager publitzitàrios sos dannos de chimbanta annos de polìtica linguìstica isballiada. No est cun issos chi nos la devimus leare, a pustis chi abarramus a sa muda cun sos sèberos de totu sos àteros (guvernos, universidades, iscolas, mass mèdia e cumpangia bella).
Lassamus·lis fàghere merendinas e cremas de nintzola. Su traballu mannu pro cambiare s’idea de sardu tocat a nois, no a issos.
Gianfranca Piras
© Tutti i diritti riservati
