Dae su 31 de martzu de su 2018 totu sas veturas e sos furgones noos sunt obligados a tènnere su sistema eCall (Emergency Call).

Custu sistema de localizatzione satellitare podet agiudare cando si tenet intzidente: podet pedire agiudu sinnalende sa positzione de su veìculu e podet telefonare in automàticu a su nùmeru de emergèntzia europeu 112 si chie est in màchina at pèrdidu connoschèntzia.

S’autista o unu de sos biagiadores, si tenent bisòngiu, si podent cullegare deretu a su 112 incarchende unu pulsante chi est in intro de sa vetura. Su sistema inditat ite tipu de agiudu serbit, in ue est sa vetura, a cara a in ue fiat andende (importante pro sas autostradas) e si su guidadore podet fàghere o nono sa telefonada. Inditat finas cantos ocupantes teniat sa màchina, si si sunt ativados sos airbag e in cale momentu est sutzessu s’intzidente.

Paret chi custu sistema potzat minimare sas mortes de su 10%.

Sos datos regortos dae sos tzentros de emergèntzia non s’ant a pòdere dare a àtere sena cunsensu de sa persone interessada.

Gianfranca Piras

© Tutti i diritti riservati