Lis narant “botti di Capodanno” ma sunt bombas de a beru, chi podent causare dannos mannos a sas cosas e finas a sa gente. In sos annos colados sa prus perigulosa fiat sa “botza de Maradona”, a pustis sunt bènnidos “Tsunami” e “Bin Laden”, bombas càrrigas de cantidades mannas de prùvura, perigulosas e illegales.

Ocannu a su coete prus chircadu li narant “Kim ‘o coreano” e leat su nùmene dae su ditadore Kim Jong-un (su chi est minetzende de ghetare razos contra a sos Istados Aunidos). Custa bomba cuntenet chilos e chilos de prùvura, podet distrùere una vetura e fàghere dannu a una domo.

Narant chi costat finas a 100 èuros e non s’agatat in totue, cheret chircadu dae bendidores “ispetzializados”.

Sas fortzas de s’òrdine, comente onni annu, in note de Annu Nou ant intensificadu s’atividade pro chircare de evitare sos perìgulos, secuestrende cantu prus materiale perigulosu ant pòdidu.

Gianfranca Piras

© Tutti i diritti riservati