«Sos sìndigos semus solos e isbandonados». Est su chi at naradu Luigi Littarru, sìndigu de Dèsulu, a pustis de sa cundenna a chimbe meses de reclusione cun sa cunditzionale pro omissione de atos de ufìtziu. Su reatu cuntestadu est chi no at fatu ochìere tres porcos cando bi fiat s’òbligu pro sa peste suina.
«Deo apo fatu semper su dovere meu», narat però Littarru chi est cumbìnchidu chi a ochìere cussos porcos tocaiat a sa Regione.
In custos annos a su sìndigu de Dèsulu l’ant isparadu sa domo e l’ant minetzadu tantas bortas. Su responsàbile non s’est mai agatadu e sas indàgine sunt istadas archiviadas.